Gester hemmer dörfe ide Braui z’Hofdere bide CD Uufnahm vode 13. Guugge Power debii sii. Sobald d’Instrument iiglade gsii sind, sind üsi 3 Heinzelmännli/frauli au scho loos gfahrä. Bim Brauiplatz aacho hends de nochli Müäh gha mitm parkiere aber es hed de doch no klapped. No schnell öpis go ässe, en gfrohrnä Toast zum Biispiil, und denn ab go Guuggenä losä. Läck sind die guet und au s’Anne-Marie hed riisig Spass gmacht. Immer meh Gnomä sind iitrudled und langsam isch au d’Nervosität nid nur bi üsem Major gstigä.
So, hemmer alles? Pauke, Gloggä, Chuchi, Sousi… Oh nei, wie schafft mers es Euphonium zvergässe. Tja das isch wohl im Proberuum liggä blibä. Aber churzerhand hemmer en Ersatz organisiert und sind de CH-Guugger us Ämmebrogg unendlich dankbar!
Ja und scho bald sind mier drah gsii. S’Mikrofon iistelle isch üs wie en Ewigkeit vorcho und mier sind scho bitzli am Bibbäre xii.
2 x de Ruef spilä und scho isch de Zauber wider verbii gsii. Schad, ich glaub mer hättet gern no eis zwei meh gspillt. Aber de andere Guugenä zuelose macht fascht gnau so vill Spass.
So hed sich denn au de Abig zum Endi gneigt und mier sind um en tolli Erfahrig riicher worde.
Villä Dank Radio Pilatus dasmer hend döffe debii sii.
Bis mald wider mal
üches Brini